പ്രീമിയർ ലീഗിൽ ന്യൂ കാസിൽ യുനൈറ്റഡിനായി മിന്നും പ്രകടനം പുറത്തെടുത്ത സ്വീഡിഷ് താരം അലക്‌സാണ്ടർ ഇസാക് ആഴ്‌സനലിലെത്തിയേക്കുമെന്ന് റിപ്പോർട്ട്. അവസാന സീസണിൽ പ്രീമിയർ ലീഗിൽ 40 മത്സരത്തിൽനിന്നായി ന്യൂകാസിലിന് വേണ്ടി 21 ഗോളുകൾ സ്വന്തമാക്കിയ താരം ആഴ്‌സനലിലേക്ക് കൂടുമാറാനുള്ള ഒരുക്കത്തിലാണെന്ന് ഇംഗ്ലീഷ് മാധ്യമങ്ങൾ റിപ്പോർട്ട് ചെയ്തു.
പ്രീമിയർ ലീഗിൽ കിരീടത്തിലേക്ക് അടുത്തിരുന്ന ആഴ്‌സനൽ ഇത്തവണ രണ്ടാം സ്ഥാനത്താണ് ഫിനിഷ് ചെയ്തത്. ഇസാക് എത്തുകയാണെങ്കിൽ ബുകയോ സാകക്കൊപ്പം ഫൈനൽ തേഡിൽ മികച്ച ഫിനിഷിങ് കോമ്പിനേഷനാകാൻ ഇരുവർക്കും കഴിയും. 2022ൽ ലാലിഗ ക്ലബായ റയൽ സോസിഡാഡിൽനിന്നായിരുന്നു താരം ന്യൂകാസിലിലെത്തിയത്.
ക്ലബ് മാറ്റം താരം നിഷേധിച്ചിട്ടില്ലെന്നാണ് വിവരം. ‘ നിലവിൽ ക്ലബിൽ ഞാൻ സന്തുഷ്ടനാണ്. ക്ലബിനൊപ്പമുള്ള യാത്ര ഇതുവരെ സന്തോഷമുള്ളതായിരുന്നു. പുതിയൊരു നീക്കം ഉണ്ടാവുകയാണെങ്കിൽ എല്ലാവരേയും അറിയിക്കുമെന്നും ഇസാക് വ്യക്തമാക്കി.
