ഗ്രൂപ്പ് റൗണ്ടിൽ ഗോളടിക്കാതെ ക്രിസ്റ്റിയാനോ
യുവഫ യൂറോ കപ്പിൽ ഗ്രൂപ്പ് റൗണ്ടിലെ അവസാന മത്സരത്തിൽ വമ്പന്മാരായ പോർച്ചുഗൽ തോൽവി രുചിച്ചിരുന്നു. എതിരില്ലാത്ത രണ്ട് ഗോളിന് ജോർജിയ ആണ് പറങ്കിപ്പടയെ ആട്ടിമറിച്ചത്. എന്നാൽ ആദ്യ രണ്ട് മത്സരങ്ങളും ജയിച്ചിരുന്ന റോണോയും സംഘവും ഗ്രൂപ്പ് ചാമ്പ്യൻമാർ ആയിത്തന്നെ പ്രീ ക്വാർട്ടർ യോഗ്യത നേടി.
ജോർജിയക്കെതിരെയും ഗോൾ നേടാൻ സാധിക്കാതിരുന്നത്തോടെ സൂപ്പർ താരം ക്രിസ്റ്റിയാനോയ്ക്ക് ഈ യൂറോ കപ്പിൽ ഇതുവരെ അക്കൗണ്ട് തുറക്കാനായിട്ടില്ല. ചരിത്രത്തിലാദ്യമായാണ് ഒരു മേജർ ടൂർണമെന്റിൽ ഗോൾ അടിക്കാതെ റൊണാൾഡോ ഗ്രൂപ്പ് സ്റ്റേജ് അവസാനിപ്പിക്കുന്നത്. മൂന്ന് മത്സരങ്ങളിൽ ഒരു അസിസ്റ്റ് മാത്രമാണ് ഈ യൂറോയിൽ താരത്തിന്റെ സമ്പാദ്യം. രണ്ടാം മത്സരത്തിൽ തുർക്കിക്കെതിരെ ബ്രൂണോ ഫെർണാണ്ടസിന് നൽകിയ അസിസ്റ്റ് ആണത്.
ഇതിനിടെ പോർച്ചുഗലിനായി മേജർ ടൂർണമെന്റുകളിൽ 50 മത്സരം കളിക്കുന്ന ആദ്യ താരമായി റൊണാൾഡോ മാറി. 28 യൂറോ കപ്പ് മത്സരങ്ങളിൽ കളത്തിലിറങ്ങിയ താരം 22 ലോകകപ്പ് മത്സരങ്ങളിലും ബൂട്ടണിഞ്ഞു.
ജോറായി ജോര്‍ജിയ: പോര്‍ചുഗലിനെ പഞ്ഞിക്കിട്ടു
യൂറോ കപ്പില അവസാന ഗ്രൂപ്പ് റൗണ്ട് മത്സരത്തില്‍ പോര്‍ചുഗലിനെ വീഴ്ത്തി ജോര്‍ജിയ. എതിരില്ലാത്ത രണ്ട് ഗോളിനാണ് ക്രിസ്റ്റിയാനോ റൊണാള്‍ഡോയും സംഘവും ജോര്‍ജിയക്കു മുമ്പില്‍ കീഴടങ്ങിയത്. മത്സരത്തില്‍ പരാജയപ്പെട്ടെങ്കിലും ഗ്രൂപ്പ് എഫില്‍ ചാംപ്യന്മാരായി തന്നെയാണ് പറങ്കിപ്പടയുടെ പ്രീക്വാര്‍ട്ടര്‍ പ്രവേശനം. മൂന്നാം സ്ഥാനക്കാരായി ജോർജിയയും അവസാന 16ലെത്തി. മത്സരത്തിന്റെ തുടക്കത്തില്‍ തന്നെ ഗോള്‍ നേടി ജോര്‍ജിയ പോര്‍ചുഗലിനെ ഞെട്ടിച്ചിരുന്നു. രണ്ടാം മിനുട്ടില്‍ ക്വിച ക്വര്‍ടഷേലിയയാണ് ജോര്‍ജിയയടെ ആദ്യ ഗോള്‍ നേടിയത്. ഈ ഷോക്കില്‍നിന്ന് മടങ്ങിവരാന്‍ പോര്‍ചുഗലിന് പിന്നീട് കഴിഞ്ഞില്ല.
മത്സരത്തില്‍ പന്തടക്കത്തിലും മുന്നേറ്റത്തിലും ബഹുദൂരം മുന്നിട്ടു നിന്ന പോര്‍ചുഗലിന് പക്ഷെ ഗോളൊന്നും കണ്ടെത്താനായില്ല. 57ാം മിനുട്ടില്‍ പെനാല്‍റ്റിയിലൂടെ ജോര്‍ജസ് മിക്വടട്‌സെ പോര്‍ചുഗല്‍ വലകുലുക്കി ജോര്‍ജിയയുടെ രണ്ടാം ഗോളും നേടി.
നേരത്തെ ആദ്യ രണ്ടു മത്സരവും ജയിച്ച് പ്രീ ക്വാര്‍ട്ടര്‍ ഉറപ്പിച്ചിരുന്നതിനാല്‍ ബ്രൂണോ ഫെര്‍ണാണ്ടസിനെ ബെഞ്ചിലിരുത്തിയാണ് റൊബര്‍ട്ടോ മാര്‍ട്ടിനസ് ഇന്ന് പോര്‍ചുഗലിനെ കളത്തിലിറക്കിയത്.
