കോപാ അമേരിക്കയിൽ നിന്ന് ആതിഥേയരായ അമേരിക്ക പുറത്ത്. ഗ്രൂപ്പ് സിയിൽ ഇന്ന് നടന്ന മത്സരത്തിൽ ഉറുഗ്വെയോട് പരാജയപ്പെട്ടായിരുന്നു യു.എസ്.എ പുറത്തായത്. എതിരില്ലാത്ത ഒരു ഗോളിനായിരുന്നു ആ തിഥേയരുടെ തോൽവി. ആദ്യ രണ്ട് മത്സരത്തിലും ജയിച്ചതിനാൽ ഉറുഗ്വെ നേരത്തെ തന്നെ ക്വാർട്ടർ ഉറപ്പിച്ചിരുന്നു. മൂന്നാം മത്സരത്തിലും ജയിച്ച് ഗ്രൂപ്പ് ചാംപ്യൻമാരായിട്ടാണ് ഉറുഗ്വെയുടെ ക്വാർട്ടർ പ്രവേശനം.66-ാം മിനുട്ടിൽ പ്രതിരോധ താരം ഒലിവേരയായിരുന്നു ഉറുഗ്വെക്കായി വല ചലിപ്പിച്ചത്. ഗോൾ മടക്കി മത്സരത്തിലേക്ക് തിരിച്ചു വരാൻ യു.എസ്.എ കഠിന ശ്രമങ്ങൾ നടത്തിയെങ്കിലും ഉറുഗ്വെയുടെ പ്രതിരോധം മറികടക്കാനായില്ല. ഗ്രൂപ്പിലെ മറ്റൊരു മത്സരത്തിൽ 3-1 എന്ന സ്കോറിന് ബൊളീവിയയെ തോൽപ്പിച്ച പനാമയും ക്വാർട്ടർ ഫൈനലിൽ പ്രവേശിച്ചു. ഫയാർ ദോ (22), ഗ്വരേറോ (79), യാനിസ് (91) എന്നിവരായിരുന്നു പനാമക്കായി ഗോൾ നേടിയത്. അറുപത്തി ഒൻപതാം മിനുട്ടിൽ മിറാൻഡയായിരുന്നു ബൊളീവിയയുടെ ആശ്വാസ ഗോൾ നേടിയത്.