അടുത്ത സീസണ്‍ ഐ.പി.എല്ലിനു മുമ്പ് ടീമില്‍ നിലനിര്‍്ത്തുന്ന താരങ്ങളുടെ ലിസ്റ്റ് കൈമാറാന്‍ ഇനി മണിക്കൂറുകള്‍ മാത്രം ബാക്കി. ഇതിനിടെ ഓരോ ടീമും നിലനിര്‍ത്തുന്ന താരങ്ങള്‍ ആരൊക്കെയെന്ന പല റിപ്പോര്‍ട്ടുകളും പുറത്തുവരുന്നുണ്ട്. ഈ മാസം 31നാണ് ഓരോ ഫ്രാഞ്ചൈസികളും തങ്ങള്‍ നിലനിര്‍ത്തുന്ന താരങ്ങളുടെ ലിസ്റ്റ് ഐ.പി.എല്‍ ഗവേണിങ് ബോഡിക്ക് കൈമാറേണ്ടത്. അതിനു ശേഷമാകും അധികൃതര്‍ ഈ ലിസ്റ്റ് ഔദ്യോഗികമായി പുറത്തുവിടുക.
എന്നാല്‍, ലഖ്‌നൗ സൂപ്പര്‍ ജയന്റ്‌സ് നിലനിര്‍ത്തുന്ന താരങ്ങളെ സംബന്ധിച്ച റിപ്പോര്‍ട്ട് പുറത്തുവിട്ടിരിക്കുകയാണ് ഇ.എസ്.പി.എന്‍ ക്രിക്കിന്‍ഫോ. ക്യാപ്റ്റന്‍ കെ.എല്‍ രാഹുലിനെ ടീമില്‍ നിലനിര്‍ത്തില്ലെന്നാണ് റിപ്പോര്‍ട്ടിലുള്ളത്. പകരം നായകനായി നിക്കോളാസ് പൂരനെയും കൂടെ മായങ്ക് യാദവ്, രവി ബിഷ്‌ണോയി എന്നിവരെയും നിലനിര്‍ത്തും. കൂടാതെ അണ്‍ക്യാപ്പഡ് താരങ്ങളായി മൊഹ്‌സിന്‍ ഖാന്‍, ആയുഷ് ബധോനി എന്നിവരെയും നിലനിര്‍ത്തുമെന്നാണ് റിപ്പോര്‍ട്ടിലുള്ളത്.
2022 മുതല്‍ ലഖ്‌നൗവിന്റെ നായകനാണ് കെ.എല്‍ രാഹുല്‍. എന്നാല്‍ കഴിഞ്ഞ സീസണിലെ താരത്തിന്റെ മെല്ലെപ്പോക്കിലും മോശം പ്രകടനത്തിലും ടീം മാനേജ്‌മെന്റ് അസംതൃപ്തരായിരുന്നു. ഇതിനെ തുടര്‍ന്നാണ് താരത്തെ ടീമില്‍ നിലനിര്‍ത്തേണ്ടെന്ന തീരുമാനം.
2023 സീസണിനു മുമ്പായി 16 കോടി മുടക്കിയാണ് നിക്കോളാസ് പൂരനെ ലഖ്‌നൗ സ്വന്തമാക്കിയിരുന്നത്.
Playon is an online sports magazine in Malayalam, managed and operated from Kozhikode, providing comprehensive sports coverage
