മാഞ്ചസ്റ്റർ യുനൈറ്റഡിന്റെ ഡച്ച് പരിശീലകൻ എറിക് ടെൻ ഹഗിനെ പുറത്താക്കി. സീസണിലെ ടീമിന്റെ മോശം പ്രകടനത്തെ തുടർന്നാണ് പരിശീലകനെ പുറത്താക്കിയത്. എറിക് ടെൻ ഹഗിനെ പുറത്താക്കിയതായി യുനൈറ്റഡ് ഇന്നലെയായിരുന്നു ഔദ്യോഗികമായി അറിയിച്ചത്. പകരം താൽക്കാലിക പരിശീലകനായി റൂഡ് വാൻ നിൽസ്റ്റർ റൂയി ടീമിനെ നയിക്കുമെന്നും ക്ലബ് അറിയിച്ചു. പ്രീമിയർ ലീഗിൽ അവസാനമായി നടന്ന മത്സരത്തിൽ വെസ്റ്റ് ഹാമിനോട് യുനൈറ്റഡ് 2-1ന് തോറ്റതിന് പിന്നാലെയാണ് നടപടി.
പ്രീമിയർ ലീഗ് സീസണിൽ ഒൻപത് മത്സരത്തിൽ മൂന്നെണ്ണത്തിൽ മാത്രമാണ് യുനൈറ്റഡ് ജയിച്ചിട്ടുള്ളു. നാലു മത്സരം തോറ്റപ്പോൾ രണ്ട് മത്സരം സമനിലയിൽ കലാശിക്കുകയും ചെയ്തു. യൂറോപ്പാ ലീഗിലും യുനൈറ്റഡിന് ശോഭിക്കാൻ കഴിഞ്ഞിട്ടില്ല. മൂന്ന് മത്സരത്തിൽനിന്ന് മൂന്ന് പോയിന്റുള്ള യുനൈറ്റഡ് പട്ടികയിൽ 21ാം സ്ഥാനത്താണിപ്പോൾ. യൂറോപ്പാ ലീഗിലെ മൂന്ന് മത്സരത്തിലും യുനൈറ്റഡിന് സമനിലയാണ് ലഭിച്ചത്.
