യുവേഫാ ചാംപ്യൻസ് ലീഗിൽ വമ്പൻമാർ ഇന്ന് കളത്തിലിറങ്ങുന്നു. റയൽ മാഡ്രിഡ്, മാഞ്ചസ്റ്റർ സിറ്റി, യുവന്റസ് തുടങ്ങിയ വമ്പൻമാരാണ് ഇന്ന് വിവിധ മത്സരങ്ങൾക്കായി ഇറങ്ങുന്നത്.
രാത്രി 11.15ന് നടക്കുന്ന ആദ്യ മത്സരത്തിൽ ക്രൊയേഷ്യൻ ക്ലബായ ഡൈനാമോ സഗ്രബും സ്ലോവൻ ബ്രാറ്റിസ്ലാവയും തമ്മിലാണ് പോരാട്ടം. ഇതേ സമയത്ത് നടക്കുന്ന മറ്റൊരു മത്സരത്തിൽ പി.എസ്.വിയും ജിറോണയും കൊമ്പുകോർക്കും.

സാന്റിയാഗോ ബെർണബ്യൂവിൽ നടക്കുന്ന മത്സരത്തിൽ ഇറ്റാലിയൻ കരുത്തരായ എ.സി മിലാനെയാണ് റയൽ മാഡ്രിഡ് നേരിടുന്നത്. മൂന്ന് മത്സരത്തിൽനിന്ന് ആറു പോയിന്റുള്ള റയൽ പട്ടികയിൽ 12ാം സ്ഥാനത്താണ്. രാത്രി 1.30നാണ് മത്സരം. എവെ മത്സരത്തിൽ പോർച്ചുഗീസ് ക്ലബായ സ്‌പോർട്ടിങ്ങിനെയാണ് സിറ്റി നേരിടുന്നത്. മൂന്ന് മത്സരം പൂർത്തിയായപ്പോൾ ഏഴു പോയിന്റുമായി സിറ്റി പട്ടികയിൽ മൂന്നാം സ്ഥാനത്തുണ്ട്.

ഇതുവരെയുള്ള മത്സരത്തിൽ രണ്ട് ജയവും ഒരു സമനിലയുമാണ് സിറ്റിയുടെ സമ്പാദ്യം. ഇതേ സമയത്ത് നടക്കുന്ന മത്സരത്തിൽ യുവന്റസ് ഫ്രഞ്ച് ക്ലബായ ലില്ലെയെ നേരിടും. പ്രീമിയർ ലീഗ് കരുത്തൻമാരായ ലിവർപൂളും ജർമൻ ചാംപ്യൻമാരായ ബയർ ലെവർകൂസനും തമ്മിലാണ് രാത്രി 1.30ന് നടക്കുന്ന മറ്റൊരു മത്സരം. ബൊലോഗ്‌ന ഇതേസമയത്ത് ഫ്രഞ്ച് ക്ലബായ മൊണോക്കോയെ നേരിടും.