ലോകകപ്പ് യോഗ്യതാ റൗണ്ടില്‍ വിജയവഴിയില്‍ തിരിച്ചെത്തി അര്‍ജന്റീന. ഇന്ന് രാവിലെ നടന്ന മത്സരത്തില്‍ പെറുവിനെ എതിരില്ലാത്ത ഒരു ഗോളിനാണ് മെസിയും സംഘവും പരാജയപ്പെടുത്തിയത്. മെസിയുടെ അസിസ്റ്റില്‍ നിന്ന് ലൗതാറോ മാര്‍ട്ടിനസാണ് അര്‍ജന്റീനയുടെ വിജയഗോള്‍ നേടിയത്.
ഗോള്‍രഹിതമായ ആദ്യ പകുതിക്ക് ശേഷം മത്സരത്തിന്റെ 55ാം മിനുട്ടിലാണ് മാര്‍ട്ടിനസിന്റെ ഗോള്‍ പിറന്നത്. ജയത്തോടെ പോയിന്റ് പട്ടികയില്‍ അര്‍ജന്റീന ഒന്നാംസ്ഥാനം നിലനിര്‍ത്തി. 12 മത്സരങ്ങളില്‍ നിന്ന് 24 പോയിന്റാണ് അര്‍ജന്റീനക്കുള്ളത്.

അതേസമയം ഇന്ന് രാവിലെ നടന്ന മറ്റൊരു മത്സരത്തില്‍ ഉറുഗ്വെ ബ്രസീലിനെ സമനിലയില്‍ പിടിച്ചു. വിജയവഴിയില്‍ തിരിച്ചെത്താമെന്ന ബ്രസീലിന്റെ മോഹം പൊലിഞ്ഞു. ഇരുടീമുകളും ഓരോ ഗോള്‍വീതമടിച്ചാണ് സമനിലയില്‍ പിരിഞ്ഞത്. 55ാം മിനുട്ടില്‍ ഫെഡറിക്കോ വാല്‍വര്‍ദെയിലൂടെ ഉറുഗ്വെയാണ് മത്സരത്തില്‍ ആദ്യം ലീഡെടുത്തത്. എന്നാല്‍ 62ാം മിനുട്ടില്‍ ഗെര്‍സനിലൂടെ കാനറികള്‍ ഒപ്പമെത്തി. ലോകകപ്പ് യോഗ്യതാ റൗണ്ടില്‍ ബ്രസീലിന്റെ തുടര്‍ച്ചയായ രണ്ടാം സമനിലയാണിത്. കഴിഞ്ഞ മത്സരത്തില്‍ വെനസ്വേലയാണ് ബ്രസീലിനെ സമനിലയില്‍ തളച്ചത്. സമനിലയോടെ ലാറ്റിനമേരിക്കന്‍ ലോകകപ്പ് യോഗ്യതാ പോയിന്റ് പട്ടികയില്‍ ബ്രസീല്‍ അഞ്ചാമതായി.